إشترك معنا ليصلك جديد الموقع

بريدك الإلكترونى فى أمان معنا


الاثنين، 20 يونيو، 2016

رساله من أحد متابعينا هامه جدا وتهم الجميع الرجاء الدخول

نحن اسرة موقع ومدونه كفرصقر اليوم لا نقف مع أحد ضد أحد ولكن ننقل بحيادية جميع اخبارنا ودى رساله وصلت من ساعه لينا على الصفحه الخاصه بينا على الفيس بوك.. نقلناها بالحرف كما وصلت

اللى فى الصورة دا نائب فى مجلس الشعب اسموا صلاح منصور للاسف وظيفتوا قبل ما يبقى نائب دكتور جراح... نائب فى مجلس الشعب عن مركز كفر صقر/ ولاد صقر محافظة الشرقية
المهم خلينى احكيلكوا اللى حصل مع اخويا Ahmed Elsawy
يوم الجمعة 27 مايو تم تشخيص اخويا احمد بالتهاب فى الزائدة
تم تشخيص اخويا فى مركز اشعة بالتهاب الزائدة والدكتور صاحب المركز اتصل على النائب صلاح منصور لاجراء عملية استئصال الزائدة لانها كانت ملتهبة جدا ولازم تستئصل فورا
المهم النائب كان متاح وقال هايقابلنا فى مستشفى العبور بعد نصف ساعة وفعلا جه بس اول ما حط رجله فى المستشفى لاقينا طبعا ناس اتلمت جايه تخلص مصالح من سيادة النائب اللى مش عارف يكلم اهل المريض ولا الناس اللى عايز مصالح ولا موظفين المستشفى دا غير ان تليفون سيادة النائب مبيبطلش رن
المهم بعد حوار مقتضب معاه دخل لاجراء العملية وخرج بعد تلت ساعة بيقول انوا خلص وان المساعد بتاعوا بيقفل الجرح جوا وان كل شئ تمام
خرج طبعا بسرعه وهوا بيتكلم فى التليفون ركب عربيتوا ومشى
اخويا خرج من العمليات فضل فى المستشفى اربع ساعات فى المستشفى مفيش دكتور بص عليه فين على ما سيادة النائب جه سئل هوا دخل الحمام لان دا شئ مهم جدا بعد عملية الزائدة لازم المريض يدخل الحمام قولنالوا لأ قال خدوا وامشوا هوا يدخل الحمام فى البيت مش مشكلة !!!
طبعا روحنا باخويا فضل اول يوم بعد العملية اسهال شديد جدا مبيقفش والم شديد لا يتوقف حتى بالمسكنات اتصلنا بالدكتور وبعد محاولات عديدة رد علينا وقال عادى دا طبيعى بعد العملية
فضل اخويا بيعانى مع الالم وبدأ يرجع ومفيش اكل بيقعد فى معدتوا ومش طايق رائحة الاكل من اصلوا اتصلنا على النائب قال ادولوا حقن زوفران للترجيع وبدأت بطنوا بالانتفاخ طلبنا مساعد الدكتور جالوا البيت وقال دا احتباس بول نتيجة البنج وركبلوا اسطرة !!
اخويا مرتاحش برضوا وفضلت بطنوا بتنتفخ وتزداد فى الحجم روحنا عملنا سونار من غير استشارة الدكتور دكتور الاشعة قال بعد ماعمل سونار واشعة ان فى سوائل فى البطن وانسداد معوى وروحوا للجراح اللى عمل العملية بسرعة لان الحالة حرجة جدا
روحنا لسيادة النائب العيادة بتاعتوا
طبعا العيادة ولا تفرق حاجة عن مكتب السجل المدنى ناس داخلة وناس خارجة وعيانين وناس جاية تخلص مصالحها
المهم دخلنا لسيادة النائب العيادة مستعجل جدا وتليفونوا مببيطلش رن وواقف جنبوا 3 واحد بيكتب الروشتة وواحد ماسك التليفون وواحد بيجيبلوا الادوات بتاعتوا جهاز ضغط سماعه كدا يعنى الباشا مبيعملش حاجة بايدوا
عرضنا عليه الاشعة والسونار مسكهم قعد يقلب فيهم وبعد كشف سريع قالنا دا كسل فى الامعاء نتيجة نقص البوتاسيوم _من غير ما يعمل تحليل دم _ وطبعا واقف يملى الدكتور المساعد فى الادوية وطبعا لانوا مش هوا اللى كاتب الروشتة المساعد غلط فى ادوية وقعدت اصحح فيها معاه
المهم روحنا البيت وادينا اخويا البوتاسيوم والادوية اللى كتبها سيادة النائب اخويا على الصبح
يوم الثلاثاء 31 مايو كان بيقولى حرفيا انا معدتش رايح لدكاترة ولا مستشفيات سيبنى اموت فى البيت frown رمز تعبيري
اتصلنا على سيادة النائب قال ادولوا الدواء الفولانى _كان هوا نفسوا قايلنا الغوا بليل ميخدوش تانى _
وقال ياخد مسكن قوى مصنف جدول مخدرات يعنى _نالوفين_ بعد 5 ايام من عملية زائدة !!!
فى الوقت دا خدنا اخويا بالعافية فى عربية اسعاف وطلعنا على مستشفى التيسير الخاص فى الزقازيق ساعة من العذاب على طريق مكسر لواحد مش مستحمل حد يلمس بطنوا فضلا عن مطبات وطريق مكسر
وهناك تم تشخيص اخويا بجرح ملوث فى البطن نتيجة عملية استئصال زائدة سابقة ونزيف داخلى فى البطن نتج عنوا تجمع دموى فى الحوض ادى الى التهاب فى الغشاء البرتونى المبطن للبطن وانسداد معوى -زى التقرير اللى فى الصور بيقول-
طبعا لازم عشان اصلاح الخطأ فى العملية السابقة لازم يدخل عمليات تانى اخويا دخل العناية المركزة فى ساعتها لتجهيز مؤشراتوا الحيوية للعملية وتم اجراء عملية استكشافية لاخويا لمدة ساعتين واللى ميعرفهاش دى من اسوء العمليات فى البطن جرح العملية لوحدوا بيبتدى من تحت منطقة الصدر فى منتصف البطن لغاية تحت السرة طول الجرح تقريبا 30-35 سم عملية صعبة جدا ومؤلمة للمريض بدرجة لاتوصف
اخويا فضل فى العناية المركزة لمدة 4 ايام خرج منها يوم الجمعه 3 يونيو وبعدين فضل فى المستشفى لغاية يوم 5 يونيو وخرج منها على البيت ولسه بيعانى لغاية وقت كتابة البوست من الام شديدة مبتخليهوش ينام ساعتين على بعض frown رمز تعبيري
اخويا فضل اسبوعين بالكامل من غير اكل ولا نوم عايش على المحاليل والمسكنات وعانى من الام شديدة جدا لدرجة ان دكتور العناية المركزة قالنا هوا ازاى استحمل اربع ايام الام دا لان الم التهاب الغشاء البرتونى شديد جدا واخد كمية ادوية كبيرة جدا بدون الحاجة ليها بسبب التشخيص الخاطئ
دا غيرالالم النفسى الواقع على المريض واهلوا ومفيش فى ايدينا غير اننا نقول حسبى الله ونعم الوكيل في اللى كان السبب
ربنا سبحانه وتعالى جعلك اداه فى الارض لتخفيف الام الناس ومساعدتهم تقوم بدل ما تأدى رسالتك تدخل ملعب السياسة وتنشغل عن تأدية عملك وبدل ما تخفف الام الناس تزودها وبدل ما تنقذ الناس تأذيها
انا تعمدت انى مكتبش جنب اسمك كلمة دكتور لانك مش دكتور انتا نائب فى مجلس الشعب مش فاضى للمرضى سيب الطب للناس اللى بتهتم بالناس يا سيادة النائب وخليك فى السياسة يمكن تنفع حد هناك
انما الطب سيبوا للدكاترة اللى بجد اللى مبتعرفش تنام الا لما تتطمن على مرضاهم
وحسبى الله ونعم الوكيل

تجديد حبس طالبين سربا الامتحانات على الفيس بوك بكفرصقر


http://kafrsaqr.blogspot.com/
جددت نيابة كفر صقر بمحافظة الشرقية،حبس طالبين ضبطا أثناء تصويرهما ورقة الأسئلة الخاصة بمادة الكيمياء بمعهد بنين كفر صقر الثانوى الازهرى ، ومحاولتهما نشرها على موقع التواصل الإجتماعى "فيسبوك".

كان اللواء حسن سيف مدير أمن الشرقية تلقى إخطارًا من، العميد أحمد عبدالعزيز رئيس مباحث المديرية يفيد بضبط الطالبين "حسام أ.م" 18 سنة-ومقيم حانوت، "محمد أ.ل"18سنة-، ومقيم المنشية الجديدة بدائرة المركز، وبحوزتهما هاتفين محمول أثناء محاولتهما تصوير ورقة الأسئلة الخاصة بمادة الكيمياء داخل لجنة معهد بنين كفر صقر الأزهرى، ومحاولتهما نشرها على موقع التواصل الإجتماعى "فيسبوك" على صفحة "ثورة التعليم الفاسد".

وتحرر عن ذلك المحضرين "3271، 3272" إدارى المركز، وتحرر عن ذلك مذكرة بمعرفة مندوبى مشيخة الأزهر الشريف.

أعلان مدفوع

أعلان مدفوع

فيديوهات مختاره

كفر صقر اليوم